පාප්ප භාජනේ , වෙසක් සැරසිලි හා බකට් එක.

 2009/05/03 

 ජීවිතේ කොහේ හරි මුල්ලක ඉන්නවද උඹ ආදරේ කරපු යාළුවෙක්? සමහර තැන් වලදි හිතුන අනේ මේකා මගේ වුනා නම් කියලා හිතෙන? ඒ චුටියට හිනාවෙන හුරතලේට ලඟ කැරකුන... ඒත් ඒ වෙනකොටත් ඌ ඉස්සර වෙලා තිබුන? උගේ කොල්ලත් එක්ක වැලන්ටයින් සමරන්න උඹට කියලා ඩෙකරේශන් දා ගත්ත මොහොතක්! ලියන කොලේ ඉරලා දාලා මාත් උඹට ආදරෙයි කියන්න ඕන වුනත් වෙනදටත් වඩා ඕන කමින් ඉල්ලපු දේ හොදට කරල දීපු අතීතයක්.

සුදු කලිසම ඇදගෙන ඇන්ද නවපු පුටුවක් උඩ නැගලා  සැරසිලි කරනකන් උඹ ගාව පහලට වෙලා උස මදි නිසා පාප්ප භාජනේ අල්ලන්න ඒක ඔළුව උඩ තියාගෙන හිටපු එකෙක්ට හිතින් ආදරේ කරලා බලපන්! 

හයේ හතේ කතා කරලවත් නැති එකෙක්ට තිබුන ඇල්ම ටිකකින් මේකා හොරකම් කර ගත්ත හැටි පුදුමයි.

2009/08/12

ඌ උගේ ගමන යනකොට උගේ කොල්ලගේ හොද නරක බලන්න කොල්ලගේ හච් නම්බරේට කෙල්ලෙක් වගේ මැසේජ් කරලා  ඩේලි අප්ඩේට් එකක දීපු ජීවිතේ හොදයි කියලා හිතුනවෙලාවල් තියෙනවා.

අවුරුද්දකට සැරයක් ඩෙස් පුටුවල තීනත ගානකොට මාමා එක්ක හරි බාප්පා එක්ක හරි ඒකත් සෙනසුරාදා එනකන් බලන් හිටපු වෙලාවක් තිබුනා. ආපු කාට හරි ඒකා මාවා අදුන්වලා දෙනකොට මේ ඉන්නේ මගේ හොදම හොදම යාලුවෙක් අයියා කෙනෙක් වගේ කියලා කියනකොට. අර තිබුනු හැඟීම ආඩම්බරයත් එක්ක වැඩි වුනා මිසක් අඩු වුනේ නම් නැහැ. ඒත් මොනව කරන්නද ඉස්සර වුනා මම ඉස්සර වෙන්න කලින්.

2009/10/03

ඒකි මගේ ජීවිතෙන් ඈත් වෙලා ගියා වගේම වෙන ජිවිතේකට ලං වෙන්න..ආයෙත් පරන ජීවිතේ හිටිය කෙනා ලඟ මම ඉස්සර වෙලා මටම කියලා කෙනෙක්ගේ අයිතිය ගත්තා.

මම මගේ පාරේ අත් අල්ලන් යනවා උඹත් ඒ පාරෙම අත් අල්ලන් යනවා. ප්‍රශ්නයක් නෑ ඒ බැදීම් තාම එහෙමයි..

2014/06/09

හැමදාම වගේ තාමත් අමතක නොකර උපන්දිනේට සුභ පතනවා. නම්බරේ මතකද ඇහුවම..කටපාඩමෙන් කියනවා! මම හැමදාම වගේ පිලි ගන්න කැමති නෑ මූ මට ආදරේ කෙරුවේ නෑ කියලා. ඒත් මම බලාගෙන ඉන්නවා තාමත් එක එකා ගාවින් ආදරේ හොයාගෙන යන හැටි. මම එක තැනක නැවතිලා ඉන්නත් මේකා එහේ මෙහෙ දුවන්නත් හේතුව විදිහට මට හිතුනේ කොහේ හරි තැනක් හිත අස්සේ  ඕන කියනා දේ ලැබුනේ නැති නිසා දැනුනේ නැති නිසා යනව ඇති කියලා. නිතර කතා නොකලත් බලාගෙන හිටියා ජීවිතේ දිහා.

2015/09/11.

හදිසියේ දවසක් එකසිය විස්ස බස් එකේ කැම්පස් එක හරිය පහු කරනකොට ස් ස් ගාන සද්දයකට හැරිලා බැලුවම මෙන්න මේකා වාඩි වෙලා හිනා වෙවී ඉන්නවා මන් දිහා බලලා. මූණ බෝල ගෙඩියක් වගේ වෙලා. රෝස පාට වෙලා මුලු ඇඟම නිකන් බෝලයක් වගෙ වෙලා. හොදම යාලුවා ළඟින් වාඩි වෙනකොට ආයෙත් මට දැනුනෙ ඉස්සර සුවඳමයි. අල්ලලා කම්මුල් දෙක මිරිකන්න හිතුනත් අමාරුවෙන් ඒ ආසාව තද කරන් හිටියා හේතු දෙකක් නිසා. පලවෙනි එක බස් එක දෙවෙනි එක අපි අපේ පාරවල් වල ගොඩක් දුර ඇවිත්. ඒ නිසා මේ ඉන්නේ ආදරේ කරපු හොදම යාළුවෙක් විතරයි. 

ශේන් දැක්කේ නෑ වගේ යන්න නේ හැදුවේ?

අනේ නෑ කෙල්ල මහත් වෙලා..එකනේ බන් අදුරගනා බැරි වුනේ..ලස්සයි ඒත් ඉසර විදිහත් ලස්සනයි බන්..

මොනවා කරන්නද ශේන්..බලෙන් මහත් වෙන්නේ බෝයි ෆ්‍රෙන්ඩ් කෑ ගහනවා බන් මහත් වෙන්න මහත් වෙන්න කියලා..උගේ වුවමනාවට තමා මේ දන්න හැමදේම කරන්නේ මහත් වෙන්න.. බලපන් ශේන් උඹේ හැටි..උඹත් අලියා වගේ වෙලා..පැණියක් වත් ගහනවද තෝත් මහත් වෙන්න..

පිස්සුද බන් මම කාලා බීලා ඔෆිස් එකේ වාඩිවෙලාම තමා ඉන්නේ ..ඒකයි රහස.

මේ බන් මම මෙතනින් බහිනවා ෆොන් එකක් බලන්න ආවෙ ..පස්සේ දවසක සෙට් වෙමු..නම්බරේ දීන්.

බෑ බන් ශේන් කොල්ලා කැමති නෑ කා ගාවවත් නම්බර් එක තියෙනවට.

ඉතින් බන් මම යාලුවෙක් නේ!

ඒ වුනාට කොලු යාලුවන්ටත් දෙන්න එපා කියලා තියෙන්නේ  ..ඉන්සටා එකෙන් ඇඩ් කරන් මැසේජ් දාහන්!

එල බන්..මම ගියා එහෙනම්..

ඔකේ බන් පරිස්සමෙන් ශේන්.

බස් එක ඌවත් අරගෙන ගියා මම බැහැපු ගමන්ම.

මම කල්පනා කලේ හැමදාම මම බස් එකට මැදින් පරක්කු වෙලා නැඟලා..ගමනාන්තයට කලින් බහිනවාමයි නේද කියලා.

........................................

ශේන් උඹ මම වෙනස් වෙන්නේ මේ කඩ ඉරට උඩින්..

බස් එක නවතිනකම් ඌ යයි..මොකද එතනින් තව බස් එකක් ගන්න ඕන නිසා.. 

මම ආපහු යන්න ඕන ..පාරෙන් අනිත් පැත්තට පැනලා ආපු තැනටම..උඹ වගේ නෙමේ බන් මම..🙄🖤

ටටා..

 .කවී.